Mayorga ye un conceyu llïonés allugáu anguañu na provincia de Valladolí. Cun esta páxina web tentaremos de contribuyir al espardimientu de la conocencia de la hestoria, nicios y carauterísticas del nuesu conceyu, y tou eillu na nuesa llingua, la llingua llïonesa.

Nel censu del INE de 2005 tenía 1972 habitantes, 1782 en 2005. 1712 en 1996.

Mayorga ye uno de los conceyos más estensos de los territorios llïoneses cun 163 kilómetros cuadraos de tarrén dedicaos cimeiramente a la ganadería y l'agricultura, allugada a 774 m d'altitú na meseta norte y na comarca natural de Tierra de Campos, nel marxe esquierdu del ríu Cea y na llinde cuna provincia de Llión, tandu a 60 km de la súa ciudá capital pula estrada N-601. Outras estradas comunican cunas poblaciones cercanas de Saelices de Mayorga, ou Safagún pula VA-942 hacia el nordeste y pula mesma hacia'l suroeste cun Castrobol a 6 km, Coyanza a 20 km p'hacia el norueste pula C-621 y pula estrada llocal hacia l'esti Villalba de la Llomba a 6 km.
Llinda al norte cuna provincia de Llión (ente outros conceyos Izagre), al este cunas poblaciones de Saelices de Mayorga, Villalba de la Llomba y Villagómez, y al sur cunos municipios de Castroponce y Castrobol.